Daar word op die oomblik in die kerk meer gepraat oor self-ontplooiing as oor self-opoffering.-Anon.......As ‘n kerk haar woorde begin devalueer, dan word die kerk ‘n ramp vir die volk. - K Schilder

5/15/2011

Is dit sonde om te rook?


Eintlik moes die titel net "Sonde" of iets soos "Wat is sonde?" gewees het, maar ek het gedink hierdie titel sal meer aandag trek.

Ek het nou al baie keer heen en weer redenasies gehoor of iets sonde is of nie. Ek wil probeer 'n paar stukkies rofwerk in my gedagtes hier neersit, dalk probeer om 'n paar vrae gestel te kry en hopelik ook geantwoord te kry? Miskien laat ek my te veel beinvloed deur die Liberaliste, maar ek wil nie graag begin aantuigings maak oor watter goed sonde is en watter nie. Die eerste deel sal ek probeer Liberalis-vriendelik hou.

Daar is vir my twee aspekte rondom vrae aangaande sonde. Eerstens wonder ek oor die motief van iemand wat probeer bewys iets is sonde (dit sluit my in). Hoekom wil ons so graag sekere dinge geklassifiseer kry as "sonde" en stry dat bitterlik dat sekere ander dinge nie sonde is nie?

Ek ken iemand wat oppad was om 'n argument te maak dat dit sonde is om 'n motor te ry wat baie koolstofgasse uitlaat en nie 'n meer ekonomiese en omgewings vriendelike motor nie. Hierdie selfde persoon het op sy rekenaar verskeie prentjies van yl geklede jong dames en sien blykbaar niks daarmee fout nie, al is hy getroud.

Hieroor, oor die motief agter dade klasifiseer as Sonde, sal ek later meer gesels.

Die tweede aspek is die effek van sonde. Wat gebeur as ek sonde doen? Kan dit my dalk help om dade te klasifiseer as sondes of nie?

Miskien moet ek iewers ook iets se oor my belewenis van Jesus wat nie net gekom het om ons te verlos van die hel wat ons verdien nie (skuus liberaliste), maar wat my ook kom vry maak van die slawerny van sonde, hoe Hy my kry om 'n sonde te los (of minder te doen) en hoe dit my vrymaak, dat ek nie meer die slaaf van daardie sonde is nie.

Lees asb. verder in die kommentaar. (Terloops, ek gaan nog my die rook uitkom)

25 comments:

Danie Loots said...

Die effek van sonde - Deel 1
Ek dink meeste sondes, ook die wat ek nog mee sukkel, is, om dit eenvoudig te stel, dom dinge wat ons doen.

Ek oortree die verkeerswette en raak dan kwaad vir die gereg as hulle my vang, of blammeer die toestand van die paaie as ek 'n ongeluk maak. Toe ek gebid het dat die Here my moet bewaar op die pad, was die eerste ding wat Hy gedoen het om my te beskerm dalk dat ek stadiger moet ry.

Elke liewe ding wat ons doen of se het 'n gevolg. As ek 'n probleem het met kos (of sjokolade!), het dit 'n effek op my liggaam. Dit is nie die Here wat my maag (of heupe :-) ) groter maak nie, dit is sommer my eie domgeid. Boonop is dit nogal merkwaardig watter slegte gedrag ek toon wanneer ek toelaat dat ek my maag aanbid.

Hoef ek enige iets oor die effek van rook te se? Of oor die effek van misbruik van drank?

Wat van die effek van wellus op die liefdesverhouding wat ek met my vrou het? As ek vry is van alle pornografie en wellus, het die Here dalk baie meer kans om ons 'n goddelike huwelik en huisgesin te laat he. As daar net een vrou in my gedagtes is, voel hierdie vrou dalk baie meer veilig en gekoester as ooit.

Is rook, ooreet, drankmisbruik, pornografie, ens. sonde?

Ek kan maar redeneer soos ek wil, met of sonder die Bybel onder die arm, ek dink om in enige van hierdie dinge te volhart is stupid. En ja, ek dink dalk ek is slim, maar soms is ek ook maar stupid.

Danie Loots said...

Die effek van sonde - Deel 1b
Wat van saambly? (Nou moet ek mooi trap of ek word 'n fundamentalis genoem.)

Ek begin al meer 'n idee kry van wat God se idee van die perfekte gesin is en ek moet erken ek kan nie anders om te dink dat 'n samelewing waaruit 75% uit gesonde gesinne bestaan, enige iets kan regkry nie. 'n Werklik gesonde gesin sal baie ver kom om aan almal se behoeftes te voorsien. Die Man sal soos 'n koning in sy huis voel, hy sal hard werk, maar so min moontlik persoonlike tyd opoffer, omdat hy nie kan wag om by sy vrou en kinders te kom nie. Die vrou sal mooi, gekoeser, spesiaal en gelukkig wees, straal van liefde en moeite doen om haar huis gelukkig te hou. Die kinders sal dalk groepsdruk voel, maar nooit ingee om verkeerde goed te doen nie. Die kinders se ouers se siening oor dinge sal belangriker wees as hul maatjies sin. (Die ouers sal waarskynlik ook dan gesonde oordeel he om die regte goed te kies om kinder oor te dissiplineer).

Ek kan aanhou om hierdie ideale gesin te skilder en ek weet dit is net in diepe afhankilikheid en leiding van God wat ek kan droom om my gesin daarheen te neem, maar ek sal aanhou strewe vir beter, en meestal is die skaafwerk te doen aan myself.

Maar om terug te kom by daardie ideale gesin, ek kan nie sien hoe 'n paartjie wat ongetroud saambly bg. ideaal ooit kan verwesenlik nie. Wanneer die man bid vir geluk in sy huis, sal een van die eerste dinge wat die Here gaan doen om geluk te bring in daardie huis, waarskynlik wees om te se om te trou.

As meneer dan kies om steeds nie 100% te verbind deur te trou nie, moet hy maar maai wat hy saai en hopelik nie sy vriendin / metgesel blameer nie.

So het 'n homoseksuele lewe ook 'n effek.

Ja, daar is sekerlik mense wat saambly, of homoseksuele paartjies wat gelukkiger is, as sommige getroudes, maar vir die ongelukkige getroude het ek altyd hoop, is daar altyd kans vir deurbaak, vir God om lewe te bring aan die doodsbendere (soos die wie Esegiel lewe ingepraat het). Ek kan altyd bid dat die Here in die man of vrou se lewe ingryp.

Ek kan egter nie sien hoe anders iemand ten volle gelukkig by die huis kan wees as in 'n gesonde heteroseksuele gesin nie.

Miskien kleef ek vas aan uitgediende idees, miskien is ek maar 'n fundamentalis, of miskien het ek net 'n visie van 'n huis wat oorvloei van die Here se liefde.

Henrietta said...

Soos altyd, 'n baie interessante (en relevante) onderwerp Danie, deeglik nagevors!

'n Gedagte wat vinnig by my opkom , is iets wat oorlede Murray Janson gesê het oor rook: dat die Bybel nie spesifiek oor rook praat nie, maar dat dit 'n vieslike vuil ongesonde gewoonte is ...

Ek sou graag soos jy dieper wou dink daaroor as wat Janson gesê het en dan kom dele by my op soos dat ons liggame 'n tempel is van die Heilige Gees. Sal my gedagtes verder daaroor laat gaan

Danie Loots said...

Die effek van sonde - Deel 2
Waarskuwing: Inhoud is nie geskik vir sensitiewe liberaliste.

Die vorige kommentare wou ek uitwys dat elke keuse wat ek maak 'n praktiese gevolg het. Miskien kry ek tyd om nog 'n paar "dom keuses" se effek oor te praat.

Hierdie deel egter gaan meer oor die geestelike implikasies van sonde en ongehoorsaamheid. Daar is 'n paar begrippe wat ek uit die Bybel en praktiese ervaring geleer het rondom hierdie onderwerp wat vir my belangrik is.

1. God haat sonde
2. God het die sondaar lief
3. Sonde bring verwydering tussen mens en God
4. Omdat God my liefhet, dissiplineer Hy my soms sodat ek meer vrugte kan dra (Joh. 15), 'n voller, ryker, vryer lewe kan lei.
5. Die duiwel kla ons aan. Hy vertel ons leuens oor ons sonde, wat ons weghou van die Vader se genade. Hy wil nie he ons moet Vader se genade en liefde ervaar nie.
6. Heilige Gees kom oortuig ons van ons sonde op 'n wyse wat Lewe bring, wat my nader aan die Vader bring, nie wegdryf nie.
7. Sonde is meestal as gevolg van een of ander leuen wat ons kies om te glo en ook 'n gebrek aan geloof in God t.o.v. 'n sekere aspek.

Danie Loots said...

Die effek van sonde - Deel 2b
Iemand het een keer vir my gese: "If you feel far away from God, guess who turned?" Wat die persoon probeer illustreer het, was dat indien ek ver voel van God af, is dit gewoonlik ek wat omgedraai het, nie God nie.

So glo ek sonde laat my skuldig voel en maak dat ek met minder vrymoedigheid na God se troonkamer toe gaan. Skuldgevoel, glo ek vas, is egter 'n leuen uit die hel! 'n Leuen wat die duiwel gebruik om my weg te hou van Vader af. Gedagtes soos: "Ja, nou hardloop jy na God toe net omdat jy Hom nodig het, maar kyk hoe veel het jy gesondig, kyk hoe slegte mens jy is."

As 'n maatjie dit vir my kind vertel nadat hy ongehoorsaam was, sal ek sy nek omdraai. Ek besluit wat my reaksie om my kind se ongehoorsaamheid gaan wees, en wanneer my kind my nodig het is sy/haar ongehoorsaamheid die laaste ding wat in die pad staan!

Netso, glo ek vas, is God se Vaderhart. Hy is hartseer oor ons sonde, ons ongehoorsaamheid, maar nooit is ek minder welkom om Sy hulp in te roep nie, nooit.

Sy hart is om my te verlos, my te help, maar nooit, ooit om my te verwerp nie. Dit is ek wat sulke dom keuses maak, nie Hy nie.

Maar sonde bring steeds verwydering tussen my en God. Daarom het Jesus gekom om my skoon te was, om te betaal vir my sondes. Ek moet egter 'n paar dinge aan my kant doen.
1. Jesus aanvaar as my Redder en Verlosser
2. Erken dat 'n sekere ding wat ek doen sonde is

Ek wou insit 3. Probeer om dit minder te doen, maar dit kom vanself. Sodra Heilige Gees my oortuig het van my sonde, en ek dan bitter dankbaar is dat my sonde vergewe is, wil ek nie meer sondig nie. 'n Geestelike vader van my, het een keer gese "Omdat ek maar kan sondig, wil ek nie meer sondig nie." En dit is presies so.

Die twee dryfvere wat baie nou saamwerk, is die besef van presies hoe God die sonde wat ek doen haat en presies hoe groot sy genade is. Hoe "groter" die sonde is waarvan Heilige Gees my oortuig, hoe groter is my ervaring van God se genade.

Was dit nie juis iets wat Jesus gese het nie, dat die sondaars, die prostitute, tollenaars, ens. wat die meeste sonde het, juis die is wat meer dankbaar is vir God se genade.

Maar in Romeine waarsku oom Paulus ons juis dat ons nie meer moet sondig omdat ons dan meer genade ontvang nie. Ek dink dit kom sommer outomaties as Heilige Gees my oortuig het, en nie 'n mens of die duiwel nie.

Danie Loots said...

DIE EFFEK VAN SONDE - DEEL 2C
Dood het in hierdie wereld ingekom as gevolg van sonde. (Bots bietjie met miljarde jare se dood en natuurlike seleksie) Die hele skepping is vervloek as gevolg van twee mense se sonde.

Die effek van Adam en Eva se dom keuse (bitterlik dom vir sulke slim mense!) het die natuur baie meer benadeel as besoedeling en globale verwarming. Dit is hoekom Paulus se in Romeine 8, dat die hele Skepping wag in pyn.

Is dit regverdig van God om dit te doen? Om die hele skepping te vervloek a.g.v. twee mense se sonde (eintlik 1 mens, Adam s'n)? Beslis nie volgens ons moderne uitkyk op die lewe nie.

News Flash - God is nie 'n liberalis nie.

Ek dra die effek van my Oupa se sondes! My kleinkinders gaan betaal vir my sondes! Klink dit regverdig. Nie volgens moderne definisies van regverdigheid nie.

Maar daar is 'n ander kant, my oer oer oer Oupa Grootjie, tot 'n duisend geslagte ('n duisend!) se goeie dade le ook op my boekies! Wow, wat 'n bonus. Ek weet nie eers of daar 'n duisend geslagte tussen my en Oupa Adam was nie.

Hierdie een dryf my baie om God toe te laat om die snoeisker in te le en my te help om my van ongehoorsaamheid en sonde ontslae te raak. Ek wil nie he my seun, my kleinkinders en hulle kinders moet met wellus, eet probleme, hoogmoed, onverskillige hantering van finansies en ander sondes sukkel nie.

Daar is baie te se oor "Generational Curses" en "Generational Blessings".

Gideon said...

Optrede, dade, sêgoed ens., is die gevolg / simptome van wat in die hart, gesindheid, ingesteldheid, gedagtes aangaan. Liefde (of nie-liefde) vir God en ons naaste bepaal hoe ons optree. Daarom het Jesus gesê dat liefde eintlik die samevatting is van die hele wet en al die profete, want wat in die hart is, bepaal die optrede / lewenswyse.

Daarom lees ons in Spr.16:30: “Hy wat sy oë toemaak om valsheid te bedink, wat sy lippe vasknyp, het die kwaad alreeds gedoen.” Reeds in Gen.6:5 lees ons dat God gesien het dat die mense boos was en dat “die versinsels wat hy in sy hart bedink het, altyd net sleg was”. Oral in die Psalms sien ons wat die gedagtes aan mens kan doen.

Die positiewe kom net so duidelik uit mens se gedagtes uit. In Ps.19:4 bid die digter: “Laat die woorde van my mond en die oordenking van my hart welbehaaglik wees voor u…” en Kol.3:2: “Bedink die dinge wat daarbo is, nie wat op die aarde is nie.” Rom.8:5-7 sit dit ook mooi uiteen:
“Want die wat vleeslik is, bedink vleeslike dinge, maar die wat geestelik is, geestelike dinge. Want wat die vlees bedink, is die dood, maar wat die Gees bedink, is lewe en vrede, omdat wat die vlees bedink, vyandskap teen God is; want dit onderwerp hom nie aan die wet van God nie, want dit kan ook nie.”

So watter handelinge is sonde? Rom.14:23 som dit só op: “Maar hy wat twyfel as hy eet, is veroordeel, omdat dit nie uit die geloof is nie; en alles wat nie uit die geloof is nie, is sonde.”

Is rook, drank, TV-kyk, te vinnig ry ens., ens., sonde? Is skraps-geklede vrouens op die rekenaar, planne beraam om die ander ou “terug te kry” sonde? Die vraag is miskien eerder: Wat sê die Heilige Gees vir jou daaroor?

Is rook, drank en ander skadelike dinge wat die liggaam kan beskadig, sonde? In Mark.7:15 sê Jesus: “Daar is niks wat van buite af in die mens ingaan wat hom onrein kan maak nie; maar die dinge wat van hom uitgaan, dít is die dinge wat die mens onrein maak.” Sien verder Mat.15:11-20.
Groetnis.

Liza said...

Behalwe dat 1 Korinthiërs 6:12 waarsku dat ons nie moet toelaat dat iets ons liggaam beheer nie kan ek ook nie sien hoe mens tot die eer van God kan rook of Hom daardeur kan verheerlik nie. Soos een predikant dit gestel het; Mense het al vir my gesê dat hul verhouding met die Here verbeter het nadat hulle opgehou het met rook en drink. Nog niemand het al ooit teenoor my beweer dat hul verhouding met God verbeter het sedert hulle begin rook of drink het nie.

So terloop Charles Spurgeon was glo lief daarvoor om sigare te rook...- dit maak natuurlik nie rook goed nie.

Henrietta said...

Danie , ek het ALWEER meer as die helfte van my Vodacom-data vir die maand opgebruik en die 7nm tot 7vm landlyn opsie werk met paraffien en slinger... so ek het nog nie deur al jou deeglike navorsing gewerk nie.

Wat jy basies vra, is: Is rook sonde?

Uit Matteus 15 verse 18 en 19 lees ons dat die hart die primêre bron is van die sonde. Dis nie soseer wat by die mond ingaan wat sonde is nie, “maar wat by die mond uitkom, kom uit die hart, en dít is die dinge wat die mens onrein maak” , staan daar.

Aan die ander kant moet mens erken dat verslawing (dus verslawing aan rook) ten diepste afgodery is. Dit is ‘n aanbiddingsafwyking. Sedert Adam verruil die mens God vir allerhande afgode en soek hy sy identiteit buite God, by iets soos middels of besittings, by mense deur die sug na aanvaarding of by homself deur die sug na gemak, pynloosheid of plesier. Is die liefde en aanbidding van enige substituut van die ware God, of dit nou ‘n fisiese afgod is, of ‘n mens of ‘n besitting is, dan nie afgodery nie?

Danie Loots said...

Dankie julle vir die bydraes. Ek waardeer die wysheid.

Ds. Gideon, inderdaad stem ek saam dat dit net Heilige Gees is wat my kan oortuig van my sonde en slim redenasies verdwyn gewoonlik in die niet wanneer Hy praat.

My probleem is die mense wat nie luister na Heilige Gees nie, soos die ongereddes of die yskoue Christene en dan is daar nog die Fariseers ook.

Vir die Bybelgelowige Christen, wanneer ons debateer oor of iets 'n sonde is of nie, kan ons die Woord gebruik tot 'n punt, maar soms kom ons nie ooreen nie, en dan kan ek ten minste die persoon versoek om te gaan bid en die Here te vra (ek sal dan ook so maak).

Maar vir iemand wat luister na Heilige Gees is daar altyd hoop. En realiteit is Hy oortuig mense sommer baie beter as ek. Ek kan versagtende woorde gebruik, ek kan lang redenasies, skrifgedeeltes, ens. gebruik. Wanneer Heilige Gees iemand oortuig is daar nie veel van 'n debat nie.

Ek het al telke male aan my eie bas gevoel. Dit is sommer baie maklik om met my vrou te stry. Dit is wanneer sy stilbly en vir my bid dat ek bang begin word, want ek weet wat kom. Dan bid ek ook maar vir myself :-) en Heilige Gees is telkens getrou.

Dit is 'n seer saak as Heilige Gees my oortuig van 'n sonde, maar ek moet se, hoe dieper die gat van sonde wat Hy vir my wys, hoe meer is ek bewus van Vader se onbeskryflike genade - hoe meer verstom staan ek telkens oor Sy geduld (lankmoedigheid) met my. Koning Dawid se Psalms verstaan ek dan sommer op 'n nuwe vlak.

Daardie man het darem 'n paar dom dinge in sy lewe gedoen, maar sowaar hy was 'n man wat telkens berou getoon het oor sy sonde. En ons Here noem hom 'n man na Sy hart.

Daarom het ek altyd hoop vir 'n kind van God wat toelaat dat die Here hom snoei (Joh. 15).

O, en ek stem SO saam met die deel wat se dat dit nie dit is wat in die mond ingaan wat onrein is nie, maar dit wat daaruit kom. Sjoe, daar is 'n preek (of 'n reeks preke) op sy eie.

Danie Loots said...

Geloof
Dit is ook verseker so dat een van die hoof redes hoekom ons sondig, is gebrek aan geloof op een of ander vlak.

Wanneer ek oneerlik werk met geld of steel, vertrou ek nie ten volle dat God na my sal omsien nie.

Wanneer ek wellus en pornografie toelaat in my lewe, vertrou ek nie dat God my huwelik kan transformeer en heel maak en ook in hierdie aspek voorsien nie.

Wanneer ek onregverdig op my kinders skree uit frustrasie, glo ek nie dat God my kan wysheid gee om hulle na Sy wil groot te maak nie.

Wanneer ek myself probeer regverdig en nie bereid is om na ander te luister oor my tekortkominge nie, vertrou ek nie ten volle in Sy onvoorwaardelike liefde nie.

Danie Loots said...

Motief
Een ander aspek wat ek weereens by wil uitkom is hoekom iemand so hard probeer om ander (of my) te oortuig dat iets sonde is.

Indien dit is omdat hulle weet hoe dit my vashou, my weg hou van die Vader, my in gevangenis hou, dan sal hul hart dit oor weerspieel en sal hul ook empatie he met hoekom ek myself nog skuldig maak aan hierdie sonde.

Maar indien iemand veroordelend na my kom, is dit bitter moeilik om so 'n persoon te vertrou en om selfondersoek te doen. Dan is my eerste instink om myself te regverdig, om te redeneer dat dit wat ek doen `of nie sonde is nie, `of nie so erg is nie. Ek vermoed dat die veroordelendes heel dikwels beter oor hulself wil voel, beter oor hul eie sondes wil voel.

Ek geniet dalk my vleisie 'n bietjie te veel, maar ten minste rook ek nie.

Persoonlik dink ek laasgenoemde is een van die grootste struikelblokke wanneer ons mense wil oortuig van Jesus. Hulle is juis bang ons laat hulle minderwaardig voel oor hul verkeerde dinge, hulle weet dit "deep down", hulle wil dit net nie aan hulself en ons erken nie.

Ek probeer nie al die antwoorde he nie, maar ek dink as ons die Here vra om Sy hart vir hul lewens te wys, empatie het met hulle lewe en dan die Vader se liefde aan hulle bedien, gaan hulle outomaties Heilige Gees se inspraak in hulle hart aanvaar.

Ek het in elkgeval gevind, dat bloot my onthouing van 'n seker sonde, mense reeds aankla, al se ek niks daaroor nie. Kyk maar wat gebeur as jy in 'n geselskap nooit vloek nie of nooit saampraat as daar negatief van die huweliksmaats gepraat word nie.

Wanneer die manne so "drool" oor 'n mooi dame kry ek lekker tot in my tone om hul pret te bederf met woorde soos: "Sjoe, sy is baie mooi, sy is amper so mooi soos my vrou." of "Jinne, nou laat julle my na my vrou verlang." Ek los hulle net daar en sien hoe Heilige Gees daardie saadjie water gee.

Ek wonder of die manne weet hoe dit hul vrou laat voel as hulle te hore kom van so iets.

My vrou het so 'n tipe aanmerking gemaak toe Pierre Spies by die skool was. Dit was natuurlik baie lekker vir my om daarvan uit te vind, maar ek weet ook watter reaksie dit op een van die vrouens gehad het wat dit gehoor het.

Ek dink regtig ons as Bybelgelowige Christene moet wysheid van God af pleit oor hoe om die ongereddes en sondaars te benader.

Henrietta said...

‘n Interessante sonde is die “sonde in onwetendheid begaan” (OV) - onwetend of uit onkunde ( NV) – dit word pertinent genoem of op een of ander manier na verwys in Eseg 45:20; Hand 3:17; Hebr 9:7 en 1 Pet 1:14. (die Ou Vertaling word gegee):

Eseg 45:20 So moet jy ook doen op die sewende in die maand ter wille van die wat hulle uit swakheid of uit onwetendheid misgaan het; so moet julle dan vir die huis versoening doen.
Hand 3:17 En nou, broeders, ek weet dat julle dit in onwetendheid gedoen het, net soos julle owerstes;
Heb 9:7 maar in die tweede die hoëpriester alleen, een maal in die jaar, nie sonder bloed nie, wat hy offer vir homself en vir die sondes van die volk uit onwetendheid begaan—
1Pet 1:14 Soos gehoorsame kinders moet julle nie jul lewe inrig volgens die begeerlikhede wat tevore in julle onwetendheid bestaan het nie.

Let veral op wat in die Hebr teks staan!

Liza said...

Ek weet nie van julle nie, maar as ek so oor die sonde-ding lees/nadink word ek skoon moedeloos en neerslagtig - is 'n glaskas of 'n kluisenaarsbestaan iewers in die woestyn dan al vooruitsig om geheel en al sondeloos te lewe/wees? En dit sal seker ook nie eers veel help nie, want wat van sondes van die gedagtes???

Anders gestel moet mens dan vir jou hele lewensbestaan in 'n staat van sondebesef/skuldbelydenis lewe so te meer dat jy lateraan heeltemal vergeet hoe om dit wat God jou geskenk het, nl die lewe, te lewe...??

Overgesetzynde is dit moontlik om geheel en al sondeloos te lewe? Word dit nie later eerder 'n geval van jy verval so in 'n staat van 'sonde-obsessiwiteit' nie - maw jy is so behep met alles wat sonde is dat dit jou verblind om die mooi wat ook bestaan raak te sien nie??

Danie Loots said...

Liza,

Ek stem saam met jou en indien 'n Bybelgelowige soos jy so voel, hoeveel te meer nie die ongelowiges nie.

Persoonlik dink ek dat indien iemand net sover gaan om Heilige Gees toe te laat om hulle te oortuig van hul sondes en ten minste daardie spesifieke sonde bely en probeer om dit minder te doen, is 90% van die srtyd gewonne, indien nie 99% nie. Verder kan ons altyd bid vir hulp om van daardie spesifieke sonde (nie net sondes in die bree nie) ontslae te raak.

Dawid is 'n goeie voorbeeld, en moet nie vergeet dat God hom 'n man na Sy hart noem nie, ten spyte van gruwelike sondes. Sy gesin was ook maar woes deurmekaar.

Ek dink nie ons moet ooit moed opgee nie. Ons moet net bloot beheer oorgee aan ons God. Hy weet watter sonde om wanneer te hanteer, Hy weet ook waar die wortel van die kwaad le. Hy ken ook die beste pad vir elkeen van ons om te loop om meer en meer soos Jesus te word.

Henrietta said...

Liza miskien kan ons soos Paulus na ñ hele paar "sonde-hoofstukke" in ñ jubel-lied ter ere van die sondaarsliefde van Jesus ( Rom 8:31-39) uitbars!

Gideon said...

Danie, ek stem hartlik saam met alles wat jy sê. Mens kan die Bybel tot op ‘n punt gebruik om leiding te gee, maar daar kom situasies waar die kind van die Here wat gedurig na Sy wil soek, maar net sensitief moet wees vir die leiding van die Gees (Rom.8:14). Ook die motief, soos jy sê, is nogal belangrik. Byv.: Waarom sou ek vir jy vra of jy rook? Of LSD gebruik? Ens. Waarom sou ek dit vra? Om wat te bereik? Om te help of om te oordeel? Ens.

Ek het egter opgelet na ‘n paar opmerkings wat my aan die dink gesit het. Daarom wil ek bietjie “duiwels-advokaat” speel – net om ons begrippe ‘n bietjie in fokus te kry.

As ons sê iemand rook (of drink), bedoel ons seker dat hy verslaaf is. As ons sê dat iemand drink wyn by Sondag-middagete, sal ons dit nie as verslaafdheid beskou nie. Daarom dink ek ons praat hier eintlik van verslawing – nie van die ding self nie. Bv: Toe ek op Hartenbos gewoon het, het ek en my ou vriend oorkant die straat somtyds op sy stoep, en somtyds op my stoep, gesit en die vallei sit en bekyk. Saans het hy pyp gerook. Ek het dikwels sy (2de) pyp gekry en gestop, en saam met hom gerook. Dit was egter nie verslawing nie en bedags het ek nie eens daaraan gedink nie. Sou dít sonde wees?

Sê nou maar ek kan nie bedags sonder tee bly nie – ek móét dit eenvoudig kry. Maklik 15 koppies per dag (soms afskaal na 10). [Opmerking: ek drink liewer water as tee!! ] Is ek verslaaf? Sondig ek met elke koppie tee wat ek drink? Tee (verstaan ek) bevat net soveel kafeïen as koffie – wat skadelik is vir mens se liggaam. Mens kan selfs kafeïenvergiftiging kry.

Gegewe hierdie situasies: by wattervan bg. sal Hetta se beskouiïng inpas wanneer sy sê dat mense verruil “…God vir allerhande afgode en soek hy sy identiteit buite God, by iets soos middels of besittings, by mense deur die sug na aanvaarding of by homself deur die sug na gemak, pynloosheid of plesier. Is die liefde en aanbidding van enige substituut van die ware God, of dit nou ‘n fisiese afgod is, of ‘n mens of ‘n besitting is, dan nie afgodery nie?”.
My vraag sou wees of die glasie wyn op Sondag, of die pyp nou en dan rook, afbreuk doen aan my liefde vir en aanbidding van God? En die oormaat van tee/koffie wat ek drink, sou dít sonde wees en afbreuk doen aan my liefde vir God? Of het ek Hom vervang met ‘n substituut en op díe manier besig met ‘n afgod?

Liza dink weer oor of ek sou rook tot eer van God en Hom so daardeur verheerlik. Gegewe die bg. situasies: Kan mens rêrig in elke situasie kies om iets te vermy omdat dit nie tot eer en/of verheerliking van God is nie? As ek hierdie vraag sou vra wanneer ek my oormaat tee/koffie inskink, of gaan sit om TV te kyk, (en noem maar op), watter antwoord gaan ek kry? Word God daardeur verheerlik? Is dít sonde of nie?

Wat ek probeer sê is dat ek saamstem met Danie. Ook dat ons moet ons kategorieë van wat sonde is of nie, baie goed bekyk en beoordeel. Die heel beste nog, dink ek, is dat die kind van die Here na Sy stem luister – daarom het God ons ook ‘n gewete gegee. Dawid se gewete het hom dikwels gekwel, en in die NT kry ek 28 Skrifgedeeltes wat handel oor die gewete voor God, ander mense en jouself.

Uiteindelik is dit bevrydend om te weet: God se Woord troos ons dat dit net menslik is om dikwels te struikel (Jak.3:2). Dis bevrydend om te weet dat ek nie, soos Liza dit uitdruk, obsessief te raak oor wat sonde is of nie. Dis bevrydend om te weet: My Vader ken my hart, en Hy weet….
Groetnis.

Danie Loots said...

Liza en Ds. Gideon,

Ek dink nie dit is God se wil dat ons sit en kommer oor wat is nou sonde en wat nie? Ek voel redelik sterk dat die laaste ding wat Hy wil he, is dat ons skuldig of minderwaardig voel oor ons sonde.

As ons al die wette van Levitikus gaan oopkrap, kan ons nog 'n paar groot slaggate uitwys.

Ek dink nie die Here soek perfekte mense nie, hy soek gewilliges. Hy soek mense wat hy kan gebruik. Maar ook mense wat bereid is om onder Sy leiding nader en nader aan Jesus te beweeg. Al wat hy vra is dat ons nie hardkoppig en hoogmoedig moet wees nie, maar plooibaar soos klei in Sy hande, Hom vra om ons te snoei sodat ons nog meer vrugte kan dra.

Danie Loots said...

Kom ons haal 'n spesifieke vraag of twee op. Sommer twee wat Ds. Gideon genoem het.

Rook
As ek gereeld rook, gaan dit my gesondheid raak, gaan my Lewenspolisse baie duurder wees, gaan ek 'n klomp geld uitgee aan sigarette en gaan ek baie mense om my pla. Dit alleen sou genoeg rede vir my wees om op te hou rook. Maar ek is die laaste wat kan oordeel.

Ek sou baie gesonder gewees het as ek 20kg ligter was, my risiko vir hartsiektes sou minder gewees het as ek gesonder geeet het en meer geoefen het. Ek sou minder skete en pyne gehad het, ens. So ek is maar net so dom (verslaaf?) soos die arme ouens wat probeer om rook te los.

Ds. Gideon, wat was die effek van daardie een pypie so nou en dan. Waarskynlik gering of geen. Dit is dan die vrugte wat jy pluk of gepluk het. Indien jy 20-30 sigarette 'n dag gerook het, soos jy selfse, verslaaf was, dan sou jy baie slegter vrugte gepluk het.

Is dit dus sonde om te rook? Ek wil amper sover gaan om te se dit is irrelevant. As jy baie rook gaan jy die vrugte daarvan pluk, of dit nou sonde is of nie.

Het die rook enige effek op jou verhouding met die Vader. Wel, indien jou rook verhoudinge met mense om jou belemmer, jou liefde vir jou naaste en vir God belemmer, dan is dit voor die hand liggend. Indien nie, gaan le maar daardie vraag voor Jesus se voete.

Weet dit, Jesus het klaar daarvoor betaal. Dit staan nie meer teen jou naam nie.

Danie Loots said...

Drank
So wat van drank. Die nagmaal wyn bring my nader aan die Vader en daarom is daardie antwoord vir my ooglopend.

As ek 'n glasie wyn per geleentheid saam met ete geniet, sien ek geen negatiewe vrugte nie.

Maar as my drank gebruik my huwelik en my kinders skaad, my finansies skade aandoen, my gesondheid belemmer, wel dan is dit die vrugte wat ek pluk. As ek my lewe in gevaar stel deur onder die invloed te bestuur, wel dan moet ek maar vat wat my kant toe kom.

Gaan drankmisbruik my verhouding met die Vader skaad. Beslis van my kant af. Ek gaan dalk Sondag met 'n reuse hoofpyn in die kerk sit, of dalk glad nie in die kerk sit nie. Ek gaan God se kinders, my vrou en my kinders seermaak, en daarom kan ek verwag dat God hulle gebede gaan verhoor en aan my werk om op te hou drink, al moet Hy my dissiplineer.

Danie Loots said...

Varkvleis
Iemand vra vir my oor varkvleis, is dit 'n sonde om dit te eet? Om die waarheid te se, ek het op 'n stadium woes gestoei oor watter wette in die Ou Testament nou van toepassing op my is en watter nie. Varktjoppie ingesluit. Daar is nogal 'n paar rowwe wette in Levitikus.

In die konteks van die tyd waarin Moses gelewe het, vermoed ek Varkvleis het 'n ernstige gesondheidsgevaar ingehou vir die mense. Dit is waarskynlik hoekom God dit verbied het.

En vandag? Is dit vandag 'n sonde? Ek weet nie. Ek gebruik tans lekker varkvleis, want ek kan geen gevaar sien in die matige gebruik daarvan nie. Miskien is daar 'n nadeel waaraan ek lei deur dit te gebruik, ek vertrou op die Here om dit dan aan my te openbaar. So ook as dit vandag sonde in sy oe is, dan vertrou ek ook op Hom om dit vir my te openbaar.

Danie Loots said...

Sabbat
Wat van Sondag? Wel as ek kies om 7 dae 'n week te werk, kan ek met redelike sekerheid die effek op my gesondheid, my huwelik en my gesin voorspel. Om die waarheid te se, my werkgewer gaan op die ou end waarskynlik ook daaronder lei. Bloot omdat ek nie 'n robot is nie, maar 'n mens en daarom rus nodig het.

Oor presies watter dag sien ek nie reuse probleme indien 'n Christen in bv. Saudi Arabie bv. Vrydag kerk toe gaan of afsonder i.p.v. Sondag nie.

Netso gaan ek nie my kop breek oor die sewende dag, sabbat of Sondag nie. Soos ek dit verstaan was dit in elk geval Vrydagaand 18:00 tot Saterdagaand 18:00.

Gelukkig bly ek in 'n Christen land en kan ek lekker Sondag afsonder vir kerk en my gesin.

Wat van my verhouding met die Vader. Indien ek elke dag van die week werk, dan gaan ek noodgedwonge nie veel tyd kry om stil te raak saam met die Here nie. En nog minder om my verandwoordelikheid as Man en vader in my huis na te kom. Ek gaan weereens God se kinders, my vrou en my kinders benadeel en as gevolg daarvan kan God dit dalk nodig ag om my te dissiplineer.

Danie Loots said...

So kan ek aangaan oor verskeie kwessies. Miskien wil ek dit te veel vereenvoudig, maar miskien is dit juis so eenvoudig.

Hoekom wil ek gesonder lewe, gesonder eet, meer oefen? Omdat ek 'n lekkerder lewe wil he. Hoekom wil ek nie drank in oormaat gebruik nie? Omdat ek nie my verhouding met my vrou en kinders wil skaad nie, my gesondheid wil benadeel nie, en nugter genoeg wees om my woorde te tel.

Ek probeer nie my kop breek oor wat is sonde en wat nie. Meeste is taamlik ooglopend, die waaroor ek twyfel bid ek dat Heilige Gees my wys. Hy weet baie beter as wat ek kan logies probeer uitredeneer.

Liza said...

Nou ja toe ek kan met jou saam stem, maar hoekom so lank neem om by die punt uit te kom? :))

Liza said...

Nog 'n insiggewende perspektief op sonde:
Sin, for Jesus, is not found in any kind of localization of evil outside or over there, where I can point to it, punish it, and try to change it. That is too easy, and thus it is religion’s constant temptation. Without denying sin or making light of evil, he shows us the one way of actually overcoming it. Sin, for Jesus, is the very act of accusing itself--whenever you try to expel and accuse evil groups, nations, religions, or people, and somehow leave yourself out of the equation. Instead of accusing others of sin on the Left or the Right, Jesus instead
“became sin”
(2 Cor. 5:21).
-R Rohr