Christ will always accept the faith that puts its trust in Him. -Andrew Murray......Dawid: Ek is baie benoud; laat ons tog val in die hand van die HERE, want sy barmhartighede is groot, maar laat my in die hand van mense nie val nie.-2 Sam 24:14

12/31/2008

God se wil - 'n raaisel...?

Wat is God se wil en wat is nie Sy wil nie? Hoe kan ons weet wat God se wil is? Besef ons oor die algemeen nie God se wil nie? Is dit moontlik om God se wil te ken? Hoe het God in Bybelse tye Sy wil geopenbaar? Openbaar Hy vandag nog Sy wil so?
Hierdie is vrae wat mens dikwels hoor en ook self vra. Hoe weet mens wat God se wil vir jou lewe is? Kom ons probeer hierdie vrae op ons manier antwoord...

Mart.

26 comments:

Mart said...

God se wil in hierdie lewe is waarskynlik nie 'n swart-en-wit prentjie nie. Daar is dus nie 'n vasgestelde bestemming vir ons hier op aarde nie.

Dit gaan dalk eerder oor die reis self en oor wat vir God van belang is in ons lewe...

Gideon said...

Mart, dit is nie so eenvoudig om hierdie vraag te beantwoord nie - maar dan tog heel eenvoudig.
In Pred.11:13 lees ons: "Die slotsom van alles wat jy gehoor het, is dit: Dien God en gehoorsaam sy gebooie".
As ek jou vraag sou probeer beantwoord, sou my eerste gedagte wees: Ek ken God se wil (é wat nie sy wil is nie) uit sy Woord. Daarin leer Hy my ook hoe om sy wil nog beter te leer ken deur in 'n persoonlike verhouding met hom te staan. In hierdie verhouding kan ek verwag, soos Jesus dit gestel het in Joh.14:26: "... maar die Trooster, die Heilige Gees, wat die Vader in my Naam sal stuur, Hy sal julle alles leer en sal julle herinner aan alles wat Ek vir julle gesê het."

Groetnis vireers.

Mart said...

Dis nogal interessant dat ons dikwels weet wat ons gade, kinders, buurman, vriende behoort te doen. Maar die moeilike ding is om te weet wat EK behoort te doen. Hierdie is 'n diepsinnige, onpeilbare onderwerp.

Is daar enigiemand wat nog nooit vir God 'n vuis gewys het en uitgeroep het: "God, wat doen U?" nie? So baie dinge wat in hierdie lewe plaasvind, is onmoontlik om te peil.

Van waar ons is, besig om voort te tonnel, is dit net sand wat onmiddellik voor, agter en langs ons sigbaar is. Maar vanuit God se uitkykpunt kan Hy presies sien waar ons voorheen was en weet Hy presies waarheen ons op pad is...

Elna said...

Dis presies so, Mart'jie.

Ek lees tans die boek "The Shack". Hierin spandeer Mack 'n naweek in die teenwoordigheid van God - eintlik die 3-eenheid. Hy's kwaad vir die Here omdat sy 6jarige dogtertjie 3,5 jaar gelede weggeraak het. Ek's nognie klaar om te weet of die verdwyning van die dogtertjie binne God se wil was nie, maar wat reeds hier duidelik word is dat God heilig is. Ons probeer 'n greep kry op Sy heiligheid, maar skarrel maar... "...many folks try to grasp some sense of who I am by taking the best version of themselves, projecting that to the nth degree, factoring in all the goodness they can perceive, which often isn't much, and then call that God."

En, lyk dit my, is die doel van Mack se besoek aan God om die wonde te heel wat tussen hom en God gekom het. "Life takes a bit of time and a lot of relationship", sê God vir hom.

Kersdag se preek het ook gegaan oor die "prentjies" wat ons van God het. En hoe moeilik dit vir ons is om dit te verander, want dit is nie noodwendig die regte een nie.

Gister se preek by die gemeente waar ek was het gegaan oor God se intensies: Om ons te seën in hierdie lewe, en ons om te leef en Hom die eer te gee. Die teks was uit Genesis... ek't vergeet watter:-( maar sal gaan soek.

Henrietta said...

Elna, van die waarheid van hierdie stuk wat jy aangehaal het:' "Life takes a bit of time and a lot of relationship", sê God ' , kan ek getuig.

'n Ander bruikbare illustrasie wat ek gehoor het, is om God se lewensplan met 'n stuk borduurwerk te vergelyk: Hier van "onder af" sien ons net die agterkant van die borduurwerk (m.a.w. deurmekaar en los drade) maar God sien "van bo af" die perfekte prent wat Hy besig is om te borduur.

As ek kyk wat ek die afgelope 20+ jare moes deurmaak om te wees waar ek vandag is - ja, wat kan ek sê? Male sonder tal moes ek sê : "Vader, ons verstaan nie, maar ons vertrou U". Tog staan Rom 8:28 bo-oor alles geskryf, dat alles ten goede meewerk vir dié wat God liefhet…

Mart said...

Elna, dankie vir jou great plasing. Jy laat my diep dink! Ek hou baie van die stukkie waar jy skryf: "Life takes a bit of time and a lot of relationship".

God is die pottebakker; ons is die klei. Hy is die Herder; ons is die skape. Hy is die Meester; ons is die dienskneg. Ons kan net so geleerd wees soos ons wil, ons kan reken dat ons al so 'n lang pad met die Here geloop het en ons kan ons verbeel dat ons belangrik is wat God se planne betref.

Feit bly dat nie 'n enkele een van hierdie dinge ons kwalifiseer om selfs 'n deeltjie te begryp van hoekom God doen wat Hy doen wanneer Hy dit doen en hoe Hy verkies om dit te doen nie...

Groete
Mart

Daan said...

Ek weet nie of ek iets mis nie, maar in my beskeie opinie is dit 'n baie maklike vraag.

God se wil is dat die mens aan Hom gehoorsaam moet wees. Jesus som dit êrens in Mattheus op: Ons moet God en ons naaste liefhê. Punt. Dis God se wil.

Die Katolieke veral, is lief om energiek te filosofeer oor wat God se wil met hom/haar persoonlik is. Ek dink dis verkeerd.

Solank ek my naaste behandel soos ek self behandel wil word, solank ek aktief en meelewend in my gemeente is, glo ek dat ek volgens God se wil leef.

Dit is natuurlik nie maklik nie.

Daar is party Sondagoggende bitter mooi krieket op TV.

As 'n mal motoris my vloek, vloek ek hom terug. As hy stilhou en wil baklei, gaan ek NIE die ander wang draaai nie. (Nee, Daan Van der Merwe is nie 'n skuilnaam vir Chuck Norris nie.)

En dit is my punt: Die Christengelowige moet voortdurend die Heilige Gees vra om hom te lei sodat hy sal lewe volgens God se wil, en nie volgens sy eie, sondige wil nie.

Mart said...

Hallo Daan

Jy het 'n interessante uitkyk op hierdie gesprek. Jy het dit vir jouself vereenvoudig - good for you!

Dis vir my heel ingewikkelder - of miskien maak ek dit net ingewikkeld.

Wanneer dinge nie so glad verloop in mens se lewe nie, word daar vir ons geleer/gesê dat "dit God se wil is." Dis maar waaroor ek hier gesels.

Wanneer en hoe verstaan ons God se wil wanneer dit soms sleg gaan met 'n mens? My vriendin se dogtertjie het 'n tyd gelede verdrink. Hoe verklaar ons "God se wil" aan haar?

Groete
Mart

Bertus said...

Mart,

Jou laaste punt oor die verdrinking van die dogtertjie is belangrik. Vir my is dit hoogs onwaarskynlik dat dit God se wil was dat sy moes verdrink. Net soos die Tsunami in 2005 waar oor die 250 000 mense dood is.

God se wil is inderdaad 'n raaisel - indien mens onder andere kyk na die daaglikse smart en lyding rondom ons. Ek glo werklik nie dat dit God se wil is om elke liewe gebeurtenis in ons heelal te 'micro-manage' nie.

'n Almagtige God kan uiteraard die natuurwette onverwerp, en so sy wil laat geskied, maar ek vermoed, indien mens die ooglopende 'randomness' van lewe hier op aarde in ag neem, is sy wil eerder aanvanklik die skepping, en daarna sekere 'hoofstroom' ingrypings, maar meestal 'n tipe van 'terugsit' en kyk benadering.

Ek moet bieg - God wil vir my voorkom as meer deisties van aard as 'n persoonlike God wat sy wil daagliks laat geld.

Hoe anders mense - op watter moontlike basis kan ons ernstig beweer dat dit God se wil was dat 'n kind verdrink of verbrand?

Mart said...

Ek het nounet 'n lang plasing hier gemaak. Toe ek dit wou "publish", maak 'n venster oop wat sê daar is 'n "error". Nou is ek bietjie moedeloos en sal weer anderdag my eiertjie hier lê.

Mart

Liza-Nel said...

Is dit nie so dat ons baie keer alte geneig is om God met die normale gang van die lewe te verwar nie - omdat Hy regverdig is verwag ons dat die lewe ook regverdig moet wees nie?

God is nie vir my sinoniem met die lewe nie. God se liefde hang nie van omstandighede af nie. As ek so om my kyk lyk dit juis asof dit dikwels meer intens ervaar word in tye van swaarkry.

C.S. Lewis het die volgende reaksie van God ervaar in die swaarste tyd van sy lewe:
"When I lay these questions before God I get no answer. But a rather special sort of "no answer." It is not the locked door. It is more like a silent, certainly not uncompassionate, gaze. As though He shook His head not in refusal but waiving the question. Like, "Peace, child; you don't understand.”

Ten beste kan ek maar net sê dat die probleem van lyding vir alle mense deel is van daardie dowwe spieël waarin ons kyk om die wêreld te probeer verstaan, maar dan wil ek ook byvoeg dat die Christelike perspektief vir my die enigste een is wat die mens kan help om sinvol aan te gaan met die lewe ten spyte van swaarkry en lyding.

Henrietta said...

SO bly om weer jou stem hier te hoor Liza, en ook jou "handewerk" te sien - ;)))

Ek stem in hoofsaak saam met wat jy sê. Liza. God het die mens nie as 'n marionette geskape nie, maar met 'n wil. Daardie wil kan in ooreenstemming met God se wil wees, óf die mens kan kies om ongehoorsaam te wees. Sommige dinge bring mense oor hulself, soms is dinge regtig buite mens se beheer.

Oor baie van die swaarkry en lyding en hoe dit by God se wil inpas, moet mens uiteindelik sê: "Ek weet nie, ek sal maar eendag by God self in die hemel hoor."

Vir my is dit belangriker om te weet "waartoe" God iets toelaat, as om te weet "waarom". Ek bedoel, wat is sy "groter doel" met die teenspoed in my lewe. Ek dink dit is in Deutronomium 8 wat die Here sy "groter doel" met die 40 jaar in die woestyn aan die Israeliete verduidelik.

Gideon said...

'n Ruk gelede toe ek inligting gegee het omtrent "Apocalypse Prophesied", het Liza gevra dat ek een of ander tyd iets daaroor skryf. Ek het altwee die boeke (1,000+ bladsye)klaar gelees en baie daaruit geleer.

Ek weergee hier ongeveer die skrywer, Herbert Stollorz, se siening vir sover dit relevant is vir hierdie bespreking. Dit sal bars gaan, maar ek probeer:

Toe Lucifer/Satan teen God gerebelleer het, het hy 1/3rde van God se engele "saamgeneem". God sou kon wraak neem, maar dan sou Hy nie getrou wees aan sy aard van "God is liefde/waarheid/lig/lewe" nie.

Daarom het God 'n plan in werking gestel waardeur Satan en sy demone hulle eie ondergang sou bewerk. Deur hierdie plan sou Hy dan ook die "verlore" engele vervang met WEDERGEBORE mense wat uit vrye wil gekies het om Hom te dien en te eer.

Die oorspronklike engele het nooit sonde geken nie, en sou nie kon "herstel" word nie. Mense moes gebore én wedergebore word - soos 'n wurm gebore word en op 'n later stadium WEER GEBORE word waneer die wurm "doodgaan" en 'n skoenlapper word.

Op die mens toegepas beteken dit dat God hom 'n vrye wil gegee het om te kies wanneer hy met die verleidinge van Satan te doen kry. Deur praktiese ondervinding van verkeerdheid/sonde leer die mens dit ken, maar kan hy ook daarteen kies. Hy kan dan ook God se pad kies. En hoe meer die mens met sonde te doen kry en daarteen kies, hoe meer word hy "geïnokuleer". Uiteindelik is dit hierdie mense waarmee God uiteindelik Sy "verlore" engele vervang.

Daarom was die verleiding van Adam en Eva nie 'n mislukking van God se plan vir die mensdom nie, maar wel 'n wesenlike moontlikheid waarvoor God se reddingsplan voorsiening gemaak het.

Uiteindelik was dit nie God wat die ellende oor die mensdom gebring het nie, maar die mens self - net soos hy vandag nog steeds besig is om God se goeie skepping (waarvan hy die bestuurder en bewaarder moes wees), te ruïneer en te verwoes - alles natuurlik aangevuur deur Satan wat baie hard werk om God se plan te verydel.

Dwarsdeur dit alles hou God nog steeds by Sy reddingsplan - om deur Sy Heilige Gees mens tot inkeer te bring, te oortuig van sonde, en om Sy reddingsboei (Jesus Christus) te aanvaar as die enigste oplosssing vir die ellende waarin hy homself gedompel het.

Tot sover Herbert Stollorz.

Daarom is ek geneig om met Bertus saam te stem (30/12, 11.05 v.m.). Ek glo God weet en sien met groot hartseer al die ellende en hartseer waarin die mens homself gedompel het, maar dat alles deel uitmaak van Sy makro/langtermynplan. Daardeur moet die mens ook uiteindelik erken dat hy God nodig het, en dat sy enigste redding in Jesus Christus moontlik is. Dié wat Hom hardnekkig verwerp, moet uiteindelik die prys daarvoor betaal.

Vir dieselfde prys kan ons ook nie vir God die skuld gee dat omtrent al ons waterbronne besoedel is, dat duisende mense per dag 'n geweldadige dood sterf nie, dat ons natuurlike bronne uitgeput, ons ekostelsels vernietig word en honderde diere- en voëlspesies al verdwyn het nie - en dit kamma in die naam van "ontwikkeling en vooruitgang"!! My naam daarvoor is gulsigheid, gierigheid, korrupsie ens. Dieselfde geld vir geneties-gemanipuleerde plante - waarmee die mens dink dat hy kan verbeter op God se goeie skepping - en wat alreeds baie lelik skeefgeloop het en besig is om op 'n globale ramp af te stuur.

Die "bottomline" is eintlik dat ons nou alreeds in die tyd van "die groot verdrukking" (Mat.24) lewe. Die tekens van die tye wat God ons oor gewaarsku het deur Daniël en die Openbaring aan Johannes, kan slegs deur 'n blinde misgekyk word.

OPSOMMEND: God wil nie lyding, geweld, ens. hê nie, maar Sy plan loop uiteindelik uit op die redding vir hulle wat Hom erken en eer as Oppergesag.

Mart said...

GIDEON sê: "OPSOMMEND: God wil nie lyding, geweld, ens. hê nie, maar Sy plan loop uiteindelik uit op die redding vir hulle wat Hom erken en eer as Oppergesag."

Ek stem nie saam nie.

Lyding, geweld, ens. is deel van menswees. God wil dit soms wel vir ons hê. Hy laat dit dan toe.

As redding afhang van 'n proses van lyding, ens., 'then so be it!' Dan wou God dit vir ons hê. Dit is vooruit bepalend aan ons toegeken... Dit is deel van ons lewens wat reeds "geskryf is" lank voordat dit gebeur het.

Groete
Mart

Henrietta said...

Mart, hier stem ek met jou saam: daar is dinge wat deel is van God se "toelatende wil" (lees gerus Deut 8) Daar staan duidelik dat God 'n DOEL gehad het met 4o jaar deur die woestyn (wat regtig nie 'n piekniek moes gewees het nie!) - die short cut sou hulle skaars twee maande geneem het....

Daan said...

Inderdaad! Dis hierdie "toelatende wil" wat ons swak mense nooit sal verstaan nie.

Reg aan die begin het die mens, onder die invloed van Satan, verkies om aan God ongehoorsaam te wees. Die mens se ongehoorsaamheid was definitief nie God se wil nie. Hoekom het hy dit toegelaat?

Ek glo dat, ten spyte van God se almag en alwetendheid, Hy wou gehad het dat die mens self moes kies. Hy wou nie die mens dwing om aan Hom gehoorsaam te wees en vir Hom lief te wees nie.

Na alles, gedwonge liefde is geen liefde nie.

Liza-Nel said...

Where was God on 9/11?

Have you ever thought, "Where was God on 9/11 when the World Trade Center and the Pentagon were attacked?" Well, I know where my God was on the morning of September 11, 2001, and He was very busy!....

Lees gerus verder by skakel hiernaas as julle 'n tydjie het om af te knyp.
http://www.swapmeetdave.com/United/Where.htm

Gideon said...

Mart skryf:
‘GIDEON sê: "OPSOMMEND: God wil nie lyding, geweld, ens. hê nie, maar Sy plan loop uiteindelik uit op die redding vir hulle wat Hom erken en eer as Oppergesag."

Ek stem nie saam nie.

Lyding, geweld, ens. is deel van menswees. God wil dit soms wel vir ons hê. Hy laat dit dan toe.’


Mart,
1. Ek dink jy moet my “OPSOMMEND” in sy konteks verstaan (sinnelose geweld, besoedeling, vernietiging van ekostelsels ens.). Natuurlik laat God toe dat gelowiges ly en swaarkry wanneer dit nodig is (1Pet.1:6v), en Hy tugtig natuurlik dié wat Hy liefhet (Hebr.12:6; Openb.3:19) – soos ‘n vader sy kind. Maar dan laat Hy dit altyd “ten goede meewerk vir dié wat Hom liefhet” (Rom.8:28). Kan ons dáármee saamstem?
2. Ek het geskryf dat God se plan uiteindelik uitloop op die redding vir hulle wat Hom erken en eer as Oppergesag. Waarom kan jy nie daarmee saamstem nie? Of verstaan ek jou verkeerd?

Groetnis vireers.

Mart said...

Hallo almal wat in 2009 hier lees!

Ek dink ons moet God se wil onafhanklik van ons onmiddellike klein wêreldjies sien. Dit open vir ons nuwe dimensies van denke en stel ons bekend aan 'n perspektief waar ons vry is van menslike beperkings. Sodoende verskuif die fokus weg van onsself.

God het ook 'n bepalende wil wat in Job 14:1 duidelik word. Job se woorde wys ons dat God se bepalende wil sy loop neem, ongeag alles.

Vir baie van ons lyk dit asof God Hom nie sal bemoei met ons klein goedjies nie, maar ek glo dis nie die geval nie. Sy ondeurgrondelike plan neem sy loop presies volgens skedule, soos Hy dit bepaal het. Ons is nooit uitgelewer aan 'n blinde, lukrake noodlot nie.

Dis dalk hier waar ongelowiges vasbrand...

Groete
Mart

Mart said...

Gideon, ek het gereageer op jou stelling dat God nie lyding, geweld, ens. vir ons wil hê nie.

Groete
Mart

Henrietta said...

Kyk gister op National Geographic na ’n twee-uur lange program oor die e(kleinletter “-e”)vangelie van Judas. Pure gnostisisme, met ’n sterk ‘historiese Jesus”- geurtjie, die program, meen ek.

Ek skryf ene Bart Ehrman , wat nogal baie te sê gehad het oor die onderwerp, se naam neer en google dit later. Vind uit dat die ou eers ’n Christen was, en nou agnostikus (te veel apkriewe boeke gelees?).

Hy het ook ’n boek geskryf oor lyding : “God's Problem: How the Bible Fails to Answer Our Most Important Question -- Why We Suffer” (sien ook http://bartdehrman.com/books/gods_problem.htm).

Waarom het mense so ’n obsessie om antwoorde op alle vrae te hê (en veral Bybels-verwante vrae)? EN dan God in die beskuldigde bank te plaas...

’n Dominee het eenkeer vir my die mooiste opsomming oor sonde gegee: Dit is om beter te weet as God. Iewers anders het ek gelees dit is “trying to be like God, without God”. Van hierdie “slim mense” laat my nogal baie daaraan dink.

Wat is verkeerd daarmee om te sê : “ons het nie al die antwoorde nie”?

Ek wil God nie “verstaan” nie – dit pla my nie dat ek nie “al die antwoorde” het nie. Ek wil nooit ophou om my oor God te verwonder nie – as ek al die antwoorde ken, sal daar niks oor wees om my oor te verwonder nie....

Ek vertrou my Hemelse Vader, wat die ontsagwekkende heelal geskep het en alles deur die eeue der eeue daagliks onderhou het en steeds onderhou, genoeg om my hele lewe aan Hom oor te laat.

Liza-Nel said...

Henrietta:Waarom het mense so ’n obsessie om antwoorde op alle vrae te hê (en veral Bybels-verwante vrae)? EN dan God in die beskuldigde bank te plaas...

Dit kom mos nou al 'n lang pad. Vanaf die voortyd toe Lucifer en sy 'gang' hulself wou gelykstel aan God en hard met moeder aarde kennis gemaak het. Vandaar die wraak-verleiding met die appel om soos God te kan wees en alles te kan weet, regdeur tot vandag toe.
Dis soos iemand op 'n keer gesê het as ons nie self in ons kombuis water in bloed kan verander nie dan bevraagteken ons of dit wel gebeur het. As ons nie vir God in 'n boksie kan druk of Hom kan aftrek tot op ons vlak nie maak ons Hom af as 'n fiktiewe drogbeeld wat snaaks genoeg die blaam moet dra vir alles wat al op hierdie aardbol verkeerd geloop het.

Kortom ons is steeds suur omdat die appel toe nie die beloofde effek gehad het nie.

(Die "ons" verwys na die mensdom in die algemeen.)

Mart said...

Henrietta en Liza se laaste plasings laat my dink aan iets wat Henry Miller gesê het: "Confusion is a word we have invented for an order which is not understood."
Diegene wat die minste worstel met die wil van God, is diegene wat die beste kennis het van die Bybel.

In Bybelse tye het God Sy wil geopenbaar deur wonderwerke, soos toe die brandende doringbos vir Moses laat besef het dat God se wil is dat hy moet teruggaan Egipte toe om die Israeliete te red. (Toe die brand nie geblus kon word nie, het Moses besef dat God Sy wil aan hom openbaar.)

God het ook deur gesigte en drome Sy wil openbaar. Dink aan Abraham, Josef, Petrus.

God het ook Sy wil duidelik gemaak deur regstreekse openbaring, soos deur die profete. Dink aan Amos, Jesaja, Jeremia.

Volgens my opinie openbaar God Sy wil steeds vandag nog op hierdie maniere, alhoewel baie van my sal verskil.

Groete
Mart

Henrietta said...

Mart jy noem die maniere waarop mense van God se wil bewus geword het in 'n sekere saak. Soms het hulle doelbewus gesoek (soos Gideon), soms het hulle "uit die bloute" n stem gehoor (soos Moses en Noag).

Die dissipels was nog die "gelukkigste" : hulle het direk (Jesus) van God-die-Seun gehoor (byvoorbeeld toe Hy gesê het: "Volg My").

Ekself het al soveel kere in my lewe gebid en geworstel oor God se wil aangaande 'n sekere saak.

Ja, die Bybel ís ons riglyn (soos Daan gesê het) : die Here sal ons nooit lei om iets te doen wat téén Bybelse beginsels is nie.

Van die probleme wat ek al te make mee gehad het , is : wanneer is 'n saak "te onbenullig" om God daaroor te "pla" en die mees algemene, hóé hoor ek sy stem? (Ek het gewoonlik maar baie gebid, familie en vriende ook gevra om te bid en raad te gee), en uiteindelik self maar keuses gemaak na goeddunke.


Ek dink as mens glad nie belangstel in "God se wil" oor 'n saak nie en dan na willekeur self impulsiewe keuses maak, moet mens nie God blameer vir die resultate nie...

Liza-Nel said...

Henrietta jy vra wanneer is 'n saak "te onbenullig" om God daaroor te "pla"...

Ek glo nie 'n mens hoef ooit daaroor bekommerd te wees nie...as die saak vir jou belangrik genoeg is om daarvan 'n gebedsaak te maak glo ek is dit vir God net so belangrik om te luister.

Henrietta said...

Ja, inderdaad, niks is te onbenullig nie...

My seuntjie wat dood is, het eenkeer tussen sy pak diertjies 'n geliefde perdjie gehad, klein man, piepklein. Dié perdjie het op 'n stadium weg geraak. Almal het oral gesoek, dae lank, maar perdjie is skoonveld.

Hy bid toe in kinderlike geloof dat Liewe Jesus ons asseblief sal help om sy perdjie te kry. Daardie selfde dag het ons die perdjie gekry!!